ती दिन

उमेरले कोल्टे फेर्दै जाँदा 

जिन्दगिले पल्टा खाँदै गर्दा 

पटक पटक मानसपटलमा 

आउँछन उहिलेका ती दिन । 

बाँसका टटेलाको फिरफिरे 

चिलाउनेको पातको सिट्टि

छाताको तारले ठेलेर गुडाउने 

नाङ्गलोको बिटको पाङ्ग्रो । 

खेतको आली, गोरेटो र पाखोमा 

पांग्रोको पछिपछि मारेको वुर्कुसी 

पटक पटक छिनेको चप्पलको फित्ता 

त्यसलाई काम चलाउन बाघेको झुम्रो ।  

भुटेको मकैसंग मुलाको डुकु 

नुन छरेको हाडे काफल

लेकमा काँडा पञ्छाउँदै टिपेको 

भरिलो र रसिलो ऐंसेलुको गाँस । 

घाँसे पाखो ओरालोमा घुइंकिन

बाँसको कप्टेराको चिप्लेटी 

फलस्वरुप प्वालै प्वाल परेको कट्टु

र घाउ नै घाउ भएका हात गोडा । 

मोजामा झुम्रा कोचेको सानो भकुण्डो 

फुटेका माटाका भाडाको टुक्राको चाङ्ग

ढाल्ने र बनाउने खेलमा जमातै उफ्रिंदा 

बिग्रिएको बारीको पाटो र ठूलाको गाली ।

पाठशाला आउँदा जाँदाको लामो बाटो

बाटोभरि गुच्चा र सिक्काको खेल 

चकलेटका खोल र चुरोटका बट्टाको 

कित्ताको बाजी र उदेकलाग्दो हारजीत । 

खोपी, हक्र्याङ्ग, ओखर अनि के के 

नाना भाँतिका खेल र तिनका औजार 

अरू केही नभए गुच्चाको खेलमा 

हार्नेको गोलिगाँठो रन्काउने बाजी । 

सकी-नसकी रुख र ढुङ्गाको चढाई 

अचानक तिनबाट जमिनमा गुल्टाई

मर्केका, भाच्चिएका हात गोडा

च्यातिएको लुगा, सातो गएको मुटु । 

बाटोको दाँयाबाया लहलहाउँदो बाली 

दुधिलो गहु, कुटुलीकोसा, कलिलो मास

अमला, मयल, काफल, चुत्रो, मणिलो 

खाँदै, खुवाउँदै, चाख्दै, मिल्काउँदै । 

बुढा बाबुचाको सांघुरो एक झ्याले पसल 

सानो कोठामा स-साना पोका र बट्टाका सामान

दाँत सबै गएर खोपिल्टा परेको मुखले 

मुसुक्क हास्दै दिएको पाँच पैसाको पुष्टकारी ।

स्कूलका 'दादा' हरुको सान र आतंक 

तिनिहरुसंगको छुट्टै डर र संकोच 

आफ्नो टोपीको भकुण्डो बनाएको 

नीरिह भएर हेर्नुपर्ने सामर्थ्यहीनता ।

अंग्रेजीको पनि नेपालीमा पढाई

विज्ञानको सरको हासोलाग्ने बोली 

भ्यागुत्तालाई भयाकुत्ता भन्दाको रमाइलो

हरेकजसो शिक्षक‍लाई दिइएको उपनाम । 

केटाकेटीदेखिको भकभकाउने बानी

त्यसैले आफ्नो नाम भन्नुपर्दाको सकस

कैयौंपटक नाम भन्न नसक्दा वा रोकिनुपर्दा 

साथीहरुबाट 'सप्रेम' प्राप्त 'लाटो' को पदवी । 

प्वाल परेको घैंटोको पानीझैं घट्दो जीवन 

धमिलिंदै गरेका आंखा, मैलिदै गरेका दाँत

झोल्लिदै गरेका मांसपेशि, फुल्दै गएको केश 

तथापि कहिल्यै गलित नहुँने आशा, आकांक्षा । 

आफ्नो वरिपरि नाचिरहेका रोग, शोक र मृत्यु 

तिनको वीचमा पनि निशाको दीपझैं जिजीविषा 

वाँच्ने धुनमा वर्तमानको गञ्जागोल जञ्जालमा पनि 

मनमश्तिष्कमा झलझलाउँदा विगतका ती दिन । 

 --x--