कृतज्ञता

जिन्दगी छ र त दुनिया देख्न पाइयो ।
चेतना छ र त केही शब्द लेख्‍न पाइयो ।।

पसिना र रगतले यो जेथा जोडे होलान् ।
पुर्खाले दिएरै त आफ्नै थलो टेक्न पाइयो ।।

ज्ञानको सानै भएपनि दियो बलेकै रहेछ ।
त्यसैको उज्यालोले अज्ञान छेक्न पाइयो ।।

एक्लै आइयो जानु एक्लै छ थाहा छैन कता ।
बास बसुन्जेल अनेक मनीषी भेट्न पाइयो ।।

हिऊँको पानी, वनको हावा, फाँटको अन्न ।
स्वर्ग झैं भूमिमा तिर्खा, वुभुक्षा मेट्न पाइयो ।।

आखाँ पाइएछ बाहिरी र केही भित्री पनि ।
सृष्टिका नवरङ्गी छटा बुझ्‍न र हेर्न पाइयो ।।

मायालुको माया, हितैषीको शुभ कामना ।
स्वर्गीय प्रसादले जीवन मस्त सेक्न पाइयो ।।

थाहा छैन यात्रा कहाँ र कहिले सम्म छ ।
खुशी छ, अर्को सुनौलो दिन देख्‍न पाइयो ।।

धन्य मेरा सर्जक अझै पसिना बगाउँदैछन्  ।
त्यही बलमा जान्ने भै कविता कोर्न पाइयो ।।

सपना छ उपरान्तमा मात्र मुठ्ठिभरले पनि ।
भनुन् असल थियो त्यो, बोल्न र भेट्न पाइयो ।।

कृतज्ञता छ जीवन प्रति र जीवन दिने प्रति ।
एउटा सिंगो अस्तित्वलाई समेट्न पाइयो ।।

जिन्दगी छ र त दुनिया देख्न पाइयो ।
चेतना छ र त केही शब्द लेख्‍न पाइयो ।।

विहिबार ०५ आषाढ २०७६ (विहिबार २० जून २०१९)