संसार देख्ने आंखाहरु
संसारले देख्ने आंखाहरु
पानीले सजल आंखाहरु
शुष्क र शिथिल आंखाहरु ।
सपना देख्ने र देखाउने
आफ्ना चिन्ने र चिनाउने
सुख र दुखका क्षणमा
नीरले डबडबाउने आंखाहरु ।
टेढिएको भौं मुन्तिर
विस्फारित परेलिभित्र
आक्रामक चम्काइसंगै
क्रोधले रंगिएका आंखाहरु ।
सप्रेम र सरस अनुहारमा
द्रवित ओठको कम्पनमा
अतिशय करुणाभावसंगै
लोलाउने प्रेमी आंखाहरु ।
प्रश्नै प्रश्नको अविरल वर्षा
हृदय छेडुंलाझै तीखो हेराइ
कमजोरीमा प्रहारनिम्ति
सज्जित शिकारी आंखाहरु ।
धुलोमा लुलो काया थाम्दै
किञ्चित कंपित हात थाप्दै
अलिकति दयाको आशमा
भयभीत भिखारी आंखाहरु ।
यता उता लक्ष्यहीन भौतारिंदै
टार्न भाग्न भगाउन खोज्दै
आंखामा आखा नमिलाउने
ढीठ कर्मचारी आंखाहरु ।
दम्भ, रवाफ र क्रोधसाथ
होच्याउँदै हप्काउँदै थिच्दै
मै खाउँ मै लाउँको जप गर्दै
अन्त्य विर्सिने शासक आंखाहरु ।
धमिलिएको क्षितीजतिर
हत्केलाको छायाले छेकेर
हरदम सन्ततिको बाटो हेर्ने
एक्लिएका बुढ्यौली आंखाहरू ।
चर्मचक्षुभन्दा धेरै भित्र
हृदयको गहिराइमा स्थित
अनेकन भोगाइले भरिएका
सदैव खुल्ने अभौतिक आंखाहरू ।
मनको कुरा मौन बोलिदिने
अव्यक्त भावहरू व्यक्त गर्ने
व्यक्तित्व देखाउन दर्पणरुप
वुझेर बुझ्न नसकिने आंखाहरु ।
सोमबार २० भाद्र २०७९ (५ सेप्टेम्बर २०२२)
No comments:
Post a Comment