पितृ ऋण

पितृ ऋण

भन्छन् अस्तित्व अनन्त यात्रा ।
हरेक जीवन एक छोटो अंश
पुराना कति अंश आए गए
चौतारी, मोड, उकली ओराली
भन्ज्याङ्ग, खोंच, लेक, फाँट
कहिल्यै नसकिने चलचित्र जस्तो
एक पछि अर्को दृष्य, उज्यालो, अँध्यारो

वितेका अनगिन्ति कालखण्डहरू,
आउने अनेकन परिवेश र परिस्थितिहरू
ति सबै विस्मृति र अड्कलमा सीमित
न बुझ्न सकिने, न अनुमान गर्न नै
मात्र वर्तमान एक पेवा हो मेरो
जसलाई म आफ्नो भन्न सक्छु

मेरो जीवनको उद्गम र आधार स्तम्भ तिमी

मैले टेक्ने खुड्किलो र समाउने हाँगो तिमी

मैले देखेका सपनाका साक्षी र प्रेरक तिमी

मैले आकाङ्क्षा गरेका उचाई देखाउने तिमी

यस वर्तमानको आदि देखि अन्त सम्म

मेरो हरेक अस्तित्वको सूत्रधार तिमी

मेरा आकाङ्क्षाहरू कहिल्यै टारेनौ
आफ्ना इच्छाहरू कहिल्यै बताएनौ
मेरा आवश्यकता सबै पूरा गर्‍यौ
आफ्ना सहस्र जरुरतलाई थाति राख्यौ
दिनरातको तिम्रो खटाइ र परिश्रमबाट
मेरो बाटोका काँढा फाली फूल रोपिरह्यौ

पहिलो संस्मरण तिम्रो जस्तो छ ममा
त्यस्ता तिमीभन्दा बुढो पुरानो भैसकें म
तापनि तिम्रा अघि म  हुन्छु आशामुखी
तिमीबाट मार्गदर्शनको चीर अभिलाशी
तिम्रा स्नेहिल नजरसामु बालपन पाउँछु
म धेरै त्रुटिहरु गर्छु र तिनमा नै रमाउँछु

तिम्रा स्नेहिल अर्तिहरू मेरा सञ्जीवनी

तिनकै मोहमा गरिरहन्छु ससाना नादानी 

तिम्रा औंला समाएर बढेका पाइलाहरू

ती मधुर बाणीले देखाएका खुड्किलाहरू
मेरा चोटमा आहत तिम्रा मायालु हातहरू
मेरा उपलब्धीमा गर्बित तिम्रा साथहरू
मैले बाटो विराउँदाका तिम्रा सच्याइहरू
तिम्रो काँध चढी मैले टेकेका उचाइहरू
सबैको प्रतीक म प्रतिको तिम्रो समर्पण
ती अपरिमितका बदला के गरूँ अर्पण

तिमी प्रतिको मेरो ऋणको के सीमा हुन सक्छ र
मैले चाहेर पनि त्यसको शतांश पनि तिर्न सक्छु र
आशा छ एउटै तीमि प्रति म सच्चा हुन सकुँ
तिमीलाई अन्जानमै पनि कुनै ठेस नपुर्‍याउन सकुँ
तिमीले मेरालागि जति अर्पण र समर्पण गर्यौ
थोरै भएपनि त्यस्तै मेरा सन्ततिलाई गर्न सकुँ

आइतबार २६ श्रावण २०७६ (११ अगस्ट २०१९)